Anna Noël | Chwedleua
Yr oedd Anna, ferch Nadolig,
yn Frenhines
ar Ferwallt Llancyngur Trosgardi.
Ac un prynhawn, yr oedd yn un o’i llysoedd
o’r lle y gallai glywed y môr.
(Wel, bron iawn.)
A chyda hi, roedd Iorwerth Llŷr a Gwilym Ddu
a gwyrda a gwreigda heblaw hynny,
fel y gweddai
o gwmpas Brenhines.
A chyda’r hwyr,
â nhw yng nghwmni ei gilydd,
dechreuodd amser
chwedleua
am fwch a charw a sgwarnog a cheffyl a chath a chi ...
Ac yn yr ymddiddan
diflannai’r oriau
nes dod blaidd.
Ac mewn un defnyn,
daliodd eiliad fach ei hanadl yn dynn,
a cholli ei llais.
Mae yno o hyd
yn fud mewn swigen grog
yn disgwyl llafn llif y funud
i’w hollti’n rhydd ...
Pop!